相信唔少人都有听过双春兼闰月，又话果年会系好年，咁之但系佢系咩嚟呢？

双春中嘅春指嘅系二十四节气中嘅立春。要知点解一农历年内立春有两次就要先知农历系点样计。

好多人误会咗我哋日常用嘅农历系阴历，其实呢个只系啱咗一半，因为农历其实系阴阳合历，佢既用月球环绕地球所转一圈所需嘅时间去定一个月有几多日，而一年嘅周期亦会参考地球环绕太阳嘅运动。因为月球环绕地球一周回到原位需时约29.5日，所以农历月份有时系29日，有时系30日。由于按月球环绕地球运行计算12个月会有约354日，地球环绕太阳一周回到原位需要约365天，两者相差约11日，三年相差约一个月，所以平均而言每19年有7年会有一个闰月，计算起上嚟就会令农历同我哋用嘅公历差不多。

至于双春兼闰月嘅双春指嘅系立春一年内有两次，即系同一农历年有两个立春！二十四节气系按地球绕太阳定咗24个位置，所以每年节气喺公历日子相若。每逢有闰月嘅年份会有约385日，当该年有闰月，自然会包括下一个公历年嘅立春，所以双春同闰月系会一齐出现，有双春就有闰月，并唔系罕见现象。