相信唔少人都有聽過雙春兼閏月，又話果年會係好年，咁之但係佢係咩嚟呢？

雙春中嘅春指嘅係二十四節氣中嘅立春。要知點解一農曆年內立春有兩次就要先知農曆係點樣計。

好多人誤會咗我哋日常用嘅農曆係陰曆，其實呢個只係啱咗一半，因為農曆其實係陰陽合曆，佢既用月球環繞地球所轉一圈所需嘅時間去定一個月有幾多日，而一年嘅周期亦會參考地球環繞太陽嘅運動。因為月球環繞地球一周回到原位需時約29.5日，所以農曆月份有時係29日，有時係30日。由於按月球環繞地球運行計算12個月會有約354日，地球環繞太陽一周回到原位需要約365天，兩者相差約11日，三年相差約一個月，所以平均而言每19年有7年會有一個閏月，計算起上嚟就會令農曆同我哋用嘅公曆差不多。

至於雙春兼閏月嘅雙春指嘅係立春一年內有兩次，即係同一農曆年有兩個立春！二十四節氣係按地球繞太陽定咗24個位置，所以每年節氣喺公曆日子相若。每逢有閏月嘅年份會有約385日，當該年有閏月，自然會包括下一個公曆年嘅立春，所以雙春同閏月係會一齊出現，有雙春就有閏月，並唔係罕見現象。