你哋有無諗過，有一日我哋都可以去太空旅行？一路以嚟可以上太空嘅都係受過嚴格訓練嘅太空人（除咗有太空人陪同嘅太空遊客之外），但係呢個規律被打破喇！太空探索技術公司 (SpaceX) 在近日發射嘅堅韌號 (Resilience) 運載咗四個平民上太空，佢喺世界上第一架乘客全部都係平民嘅載人飛船。

堅韌號飛到離地大約590公里嘅軌道，比起國際太空站同哈勃太空望遠鏡仲要高！四名乘客喺太空做咗啲咩？佢哋有用烏克麗麗玩音樂、畫畫，仲有同兒童醫院嘅小朋友視像對話。堅韌號喺太空環繞地球三日之後喺大西洋濺落，完滿結束呢次嘅旅程。

呢次旅程或者係人類史上嘅一大步，通過地面控制，今次上太空嘅人唔需要經歷數以年計嘅訓練，開啟咗太空旅遊嘅大門。往後嘅載人航天同太空探索會唔會變得唔同，變得由平民同私人機構主導？至少太空旅遊可能係。或者喺不久嘅將來我哋每一個都有機會上太空，喺嗰度欣賞我哋嘅藍色星球，避開大氣層探索星光璀璨嘅宇宙，去太空已經唔係當初嗰個遙不可及嘅夢想！

你哋想去太空旅遊嗎？你哋又會想喺太空做啲咩？