近日社會討論垃圾徵費，人人都要正視垃圾問題。原來太空都同樣有垃圾過多嘅問題。

人類發射上太空嘅人造物越嚟越多，佢哋始終有「死亡」嘅一日，佢哋係點死呢？完成使命後嘅火箭部件、能源用盡或者壞咗嘅衛星有兩個結局，一喺跌返地球途中喺大氣層入面燃燒，唔可以完全被燃燒嘅，部分就會跌入位於南太平洋嘅「探測器墓地」。二係停留喺太空中嘅「墓地軌道」，成為圍繞地球轉嘅太空垃圾。

但係，依家喺太空圍住地球轉嘅大型太空碎片已經超過二萬件，數量持續增加，有相撞嘅機會。國際太空站同哈勃太空望遠鏡身上佈滿「子彈窿」，喺被太空垃圾撞過嘅痕跡。如果大型太空垃圾同運作中嘅載人飛船或者國際太空站相撞，嚴重嘅話有可能會危及人命。所以，太空垃圾問題不容小覷。

有咩解決辦法呢？源頭減廢係其中一個方法，例如用盡完成任務嘅探測器嘅燃料，避免佢哋意外爆炸，產生更多太空垃圾。一啲太空機構正研究派「清道夫」儀器將廢棄嘅探測器推返地球嘅大氣層或者去墓地軌道，防止佢哋任意飄動，同其他嘢相撞。

太空中嘅軌道空間係人類嘅共同資源，似乎大嘥鬼要去太空做下宣傳！其他太空飛嚟嘅垃圾又點呢？